"A BA KA DA", isang malayang tula patungkol sa sarili ng may-akda

“A BA KA DA”

A Ba Ka Da

Isang alpabetong 'di na kinikilala

Ba't 'di na tinuturo sa eskwela?

Eskwela

Aral, daldal, pakikipagkaibigan,

Ingay, walwal

Paulit-ulit, araw-araw sa kawalan

Ilang kabataang masaya sa bawal

A Ba Ka Da

Anong nangyari sa eskwela?

Aking pagkataong parang mga pirasong kailangang buuin

Paniniwalang parang bugtong na mahirap sagutin

A, Araw na ang dumating kung saan ipinakilala ka ulit sa'kin

Ba, Bakit nga ba parang hindi patas ang tadhana?

Ka, Kasi kung sino pa ang nagsusumikap ay minsa'y siya pa ang 'yong 'di binibiyayaan

Da, Dami na ring pasubok ang aking dinaanan pero

A, Alam ko kailangan lamang namin ng liwanag mo

Ba, Basta't nandiyan ka panatag ako

Ka, Kahit na naligaw ako ay natagpuan ko muli ang sarili ko

Da, Dahil sa kabutihan mo ah naligtas ako

Eskwela

Aral, daldal, pakikipagkaibigan, ingay, walwal

Wala na'ng daldal, ingay, walwal

Napalitan na 'to ng aral, pakikipagkaibigan at pagmamahal

A, Baka dahil ito sa Panginoon ko

A, Baka dahil ito sa epekto ng mga salitang binigkas mo

A, Baka dahil ito sa makapangyarihang libro na tungkol sa'yo

A, Baka- hindi na ito isang bagay na walang kasiguraduhan

Dahil sigurado ang puso kong sa’king hindi pagsuko at bawat paghinga ay ikaw ang dahilan




Bumalik sa Kalipulan ng mga Tula (Mga Malikhaing Kamay)